L-Avventuri ta’ Emilja: Mixja sa Wied il-Qlejgħa

Qomt eċitata għax kont naf li n-nanna Lina kienet se ċċempilli. Kif irrispondejt it-telefon in-Nanna qaltli b’ħeġġa: “Ilbes żarbun komdu għax illum sejrin mixja speċjali!”

Qbiżt bil-ferħ: “Fejn se mmorru?”

“Se mmorru Wied il-Qlejgħa!” weġbitni n-nanna. “U missierek Ġorġ ġej magħna wkoll!”

Tlajna fil-karozza u bdejna nsuqu lejn il-wied. Kif wasalna missieri ħassu ftit konfuż għax ma sabx fejn jipparkja.

“Ejja, Ġorġ! Għandek par saqajn u l-mixi jagħmel tajjeb!” qaltlu bit-tbissima n-nanna Lina.

Bdejt inħares madwari: siġar kbar, għasafar jgħannu, fniek jiġru u ilma frisk iġelġel bejn il-blat.

“Dan qisu post tal-ħolm!” għedt b’entużjażmu.

In-nanna Lina spjegatli kif dan il-wied kien inbena biex jiġbor l-ilma tax-xita, li jgħin lill-bdiewa jsaqqu l-għelieqi tagħhom. Semmietli wkoll xi annimali li jgħixu hemm, bħall-qanfud, iż-żrinġ ikkulurit u ħafna għasafar sbieħ.

Wara mixja sabiħa wasalna f’post fejn kien hemm ħafna ilma. Bdejt naqbeż minn ġebla għal oħra, inħares lejn il-papri jgħumu u nkanta b’ferħ kbir. “Kemm qed nagħmel memorji sbieħ!” għedt b’qalbi ferħana.

Meta wasal il-ħin biex nitilqu ħarist lejn in-nanna u għedtilha: “Il-mixi mhux biss jagħmel il-ġid lin-natura imma hu wkoll gost kbir!”

In-nanna Lina tbissmet u qaltli: “Id-dinja mimlija sbuħija… imma trid toħroġ biex tiskopriha! Ejja napprezzaw l-ambjent tagħna, ingawduh bl-aqwa mod possibbli u nieħdu ħsiebu.”